زندگی اور موت کے درمیان ایک نظم
زندگی ۔۔۔۔۔ ہم تری دہلیز پہ آبیٹھے ہیں
ہاتھ میں کاسئہ تدبیر ہے ، آنکھوں میں کسی موسمِ گل رنگ کی خواہش ہے
لبوں پہ ترے بے مہر زمانوں کے لئے شکوے ہیں
اک ذرا دیکھ کہ ہم نرم مزاجوں کے لئے
کون سی رات ہے جس رات کے آنچل میں ہوا
خواب کو آئنئہ خواب میں سر کرتی ہے
کون سا دن ہے کہ جس دن کا ظہور
حرفِ دل کے لئے صحرائے تمنا کا سفر کرتا ہے
اک ترے لمس کی خاطر ہم نے
خیمئہ دل میں جلائے ترے ہونے کے چراغ
ہاں مگر کوئی سراغ
تری آہٹ تری آواز قد وقامت و خوشبو کا سراغ
جاں بہ لب ہیں مگر اک حرفِ تسلی کے لئے
زندگی۔۔۔۔ ہم تری دہلیز پہ آ بیٹھے ہیں
ہاتھ میں کاسئہ تدبیر لئے
زندگی ہم تری دہلیز پہ آ بیٹھے ہیں