جلوہ آنکھوں پہ چھا گیا کس کا؟ (اختر شیرانی)

جلوہ آنکھوں پہ چھا گیا کس کا؟

شوق، دل میں سما گیا کس کا

 

صورت آنکھوں میں کھب گئی کس کی؟

نقش دل کو لبھا گیا کس کا؟

 

پھر کٹی ساری رات آنکھوں میں

جلوہ پھر یاد آ گیا کس کا؟

 

میرے دل سے بھلا گیا سب کچھ

یہ خیال ، آہ آ گیا کس کا؟

 

شوق ہے پھر بھی دیکھنے کا اسے

دل میں ارماں سما گیا کس کا؟

 

دل میں لی پھر حیا نے چُٹکی سی

لب پہ پھر نام آ گیا کس کا؟

 

بیٹھے بٹھائے رو دیئے اختر

دھیان اس وقت آ گیا کس کا؟

 

 

Leave a Reply

Your email address will not be published. Required fields are marked *