جس دل میں تری زلف کا سودا نہیں ہوتا
وہ دل نہیں ہوتا نہیں ہوتا نہیں ہوتا
عاشق جسے کہتے ہیں وہ پیدا نہیں ہوتا
اور ہوئے بھی بالفرض تو مجھ سا نہیں ہوتا
مانا کہ ستم کرتے ہیں معشوق مگر آپ
جو مجھ پہ روا رکھتے ہیں ایسا نہیں ہوتا
جو مست ہے ساقی نگہِ مست کا وہ تو
منت کش جام و مے و مینا کا نہیں ہوتا
کہتا ہے کوئی شعلئہ جوالہ کوئی برق
اس دل پہ گماں لوگوں کو کیا کیا نہیں ہوتا
ہاں کچھ تو بیانِ حرفِ دل میں ہے لذت
جو لب سے جدا حرفِ تمنا نہیں ہوتا
دے بیٹھے دل عیش تم ان لوگوں کو جن کی
بیداد کا واں بھی کوئی شنوا نہیں ہوتا