جمے گی کیسے بساطِ یاراں کہ شیشہ و جام بجھ گئے ہیں (فیض احمد فیض)

جمے گی کیسے بساطِ یاراں کہ شیشہ و جام بجھ گئے ہیں

سجے گی کیسے شبِ نگاراں کہ دل سرِ شام بجھ گئے ہیں

 

وہ تیرگی ہے رہِ بتاں میں چراغِ رخ ہے نہ شمعِ وعدہ

کرن کوئی آرزو کی لاؤ کہ سب درو بام بجھ گئے ہیں

 

بہت سنبھالا وفا کا پیماں مگر وہ برسی ہے اب کہ برکھا

ہر ایک اقرار مِٹ گیا ہےتمام پیغام بجھ گئے ہیں

 

قریب آ اے مہِ شبِ غم نظر پہ کھُلتا نہیں کچھ اس دَم 

کہ دل پہ کس کس کا نقش باقی ہے کون سے نام بجھ گئے ہیں

 

بہار اب آ کے کیا کرے گی  کہ جن سے تھا جشنِ رنگ و نغمہ

وہ گل سرِ شاخ جل گئے ہیں وہ دل تہِ دام بجھ گئے ہیں

 

Leave a Reply

Your email address will not be published. Required fields are marked *