برس گیا بہ خراباتِ آرزو ، ترا غم
قدح قدح تری یادیں، سبو سبو ترا غم
ترے خیال کے پہلو سے اُٹھ کے جب دیکھا
مہک رہا تھا زمانے میں سو بہ سو ترا غم
غبارِ رنگ میں رس ڈھونڈتی کِرن، تری دھن!
گرفتِ سنگ میں بل کھاتی آبجو ترا غم
ندی پہ چاند کا پر تو، ترا نقشِ قدم
خطِ سحر پہ اندھیروں کا رقص، تُو، ترا غم
ہیں جس کی رو میں شگوفے وہ فصلِ سم، ترا دھیان
ہے جس کے لمس میں ٹھنڈک، وہ گرم لُو ترا غم
نخیلِ زیست کی چھاؤں میں نَے طلب تری یاد
فصیلِ دل کے کلس پر ستارہ جو ترا غم
طلوعِ مہر، شگفتِ سحر، سیاہیِ شب
تری طلب ، تجھے پانے کی آرزو، ، ترا غم
نگہ اٹھی تو زمانے کے سامنے ترا روپ
پلک جھکی تو مرے دل کے روبرو ترا غم