اے دورِِ کور پرور (مصطفیٰ زیدی)

اب وہ خوشی ہے نہ وہ غم خنداں ہیں اب نہ گریاں

کِس کِس کو رو چکے ہیں اے حادثاتِ دوراں

 

ترتیبِ زندگی نے دنیا اجاڑ دی ہے

اے چشمِ لااُبالی اے گیسوئے پریشاں

 

دن رات کا تسلسل بے ربط ہو چکا ہے

اب ہم ہیں اور خموشی یا وحشتِ غزالاں

 

یا دن کو خاکِ صحرا یا شب کو دشت و دریا

یا شغلِ جام و صہبا اے جانِ مے فروشاں

 

ٹوٹا ہوا ہے بربط سونی پڑی ہے محفل

اے رنگ و لحن و نغمہ اے صدرِ بزمِ رنداں

 

پھولوں سے کھیلتا تھا جن میں کبھی لڑکپن

کانٹے چبھو رہی ہیں سینے میں اب وہ گلیاں

 

جیسے کسی کی آہٹ ،  راتوں کو مقبروں میں

ہر بات دردر آگیں ،  ہر راگ دہشت افشاں

 

یادوں کی چلمنوں سے لمحے پکارتے ہیں

آسیب بن کے چھت پر اترا ہے وہ ماہِ تاباں

 

جیسے کوئی کہانی روحوں کی انجمن میں

ہر بات بے حقیقت ہر شے طلسم افشاں

 

ٹیلوں کے دامنوں میں صحرائیوں کی قبریں

قبروں کے حاشیوں پر سہما ہوا چراغاں

 

کِن ساعتوں سے کھیلیں کِن صورتوں کو دیکھیں

جوئے بہارِ ساکنِ شہرِ نگار ویراں

 

کتنی بصیرتوں کی آنکھیں اجڑ چکی ہیں

اے دورِ کور پرور! اے عصرِ کم نگاہاں!

 

 

 

 

 

Leave a Reply

Your email address will not be published. Required fields are marked *