تمناؤں کو زندہ آرزوؤں کو جوان کر لوں
یہ شرمیلی نطر کہہ دے تو کچھ گستاخیاں کر لوں
بہار آئی ہے بلبل دردِ دل کہتی ہے پھولوں سے
کہو تو میں بھی اپنا دردِ دل تم سے بیاں کر لوں
ہزاروں شوخ ارماں لے رہے ہیں چٹکیاں دل میں
حیا اُن کی اجازت دے تو کچھ بے باکیاں کر لوں
کوئی صورت تو ہو دنیائے فانی میں بہلنے کی
ٹھہر جا اے جوانی ! ماتمِ عمرِ رواں کر لوں
چمن میں ہیں بہم پراوانہ و شمع و گل و بلبل !
اجازت ہو تو میں بھی حالِ دل اپنا بیاں کر لوں
مجھے دونوں جہانوں میں ایک وہ مل جائیں گر اختر
تو اپنی حسرتوں کو بے نیازِ دو جہاں کر لوں