پھرے راہ سے وہ یہاں آتے آتے (داغ دہلوی)

پھرے راہ سے وہ یہاں آتے آتے

اجل رہ گئی تو کہاں آتے آتے

مجھے یاد کرنے سے یہ مدعا تھا

نکل جائے جاں ہچکیاں آتے آتے

نہ جانا کہ دنیا سے جاتا ہے کوئی

بہت دیر کی مہرباں آتے آتے

نتیجہ نہ نکلا تھکے سب پیامی

وہاں جاتے جاتے یہاں آتے آتے

چلے آتے ہیں دل میں ارمان لاکھوں

مکاں بھر گیا میہماں آتے آتے

مرے آشیاں کے تو تھے چار تنکے

چمن اڑ گیا آندھیاں آتے آتے

نہیں کھیل اے داغ یاروں سے کہہ دو

کہ آتی ہے اردو زباں آتے آتے