آمدِ شب
دیئے ابھی نہیں جلے
درخت بڑھتی تیرگی میں چھپ چلے
پرند قافلوں میں ڈھل کے اُڑ چلے
ہوا ہزار مرگِ آرزو کا ایک غم لیے
چلی پہاڑوں کی سمت رُخ کئے
کھُلے سمندروں میں کشتیوں کے بادباں کھلے
سوادِ شہر کے کھنڈر
گئے دنوں کی خوشبوؤں سے گھر گئے
اکیلی خواب گاہ میں
کسی حسیں نگاہ میں
الم میں لپٹی چاہتیں درودِ شب سے جاگ اٹھیں
ہے دل کو بےکلی ، سیاہ رات آئے گی
جَلو میں دکھ کی لاگ کو لئے ہوئے
نگر نگر پہ چھائے گی