وہ باتیں تِری وہ فسانے تِرے (عبد الحمید عدم)

وہ باتیں تِری وہ فسانے تِرے

 شگفتہ شگفتہ بہانے تِرے

 

بس اِک داغِ سجدہ مِری کائنات

جبینیں تِری آستانے تِرے

 

فقیروں کا جمگھٹ گھڑی دو گھڑی

شرابیں تِری بادہ خانے تِرے

 

بہار و خزاں  کم نگاہوں کے وہم

بُرے یا بھلے سب زمانے تِرے

 

عدم بھی ہے تیرا حکایت کدہ

کہاں تک گئے ہیں فسانے تِرے

Leave a Reply

Your email address will not be published. Required fields are marked *