رودادِ محبت کیا کہیے، کچھ یاد رہی کچھ بھول گئے ( ساغر صدیقی)

 

رودادِ محبت کیا کہیے، کچھ یاد رہی کچھ بھول گئے

دو دن کی مسرت کیا کہیے، کچھ یاد رہی کچھ بھول گئے

 

کچھ حال کے اندھے ساتھی تھے، کچھ ماضی کے عیار سجن

احباب کی چاہت کیا کہیے، کچھ یاد رہی کچھ بھول گئے

 

 کانٹوں سے بھرا ہے دامنِ دل ، شبنم سے سلگتی ہیں پلکیں

پھولوں کی سخاوت کیا کہیے، کچھ یاد رہی کچھ بھول گئے

 

اب وقت کے نازک ہونٹوں پر، مجروح تبسم رقصاں ہے

بیدادِ مشیعت کیا کہیے، کچھ یاد رہی کچھ بھول گئے

 

اب اپنی حقیقت بھی ساغر، بے ربط کہانی لگتی ہے

دنیا کی حقیقت کیا کہیے، کچھ یاد رہی کچھ بھول گئے

Leave a Reply

Your email address will not be published. Required fields are marked *