دل سے تِری نگاہ جگر تک اتر گئی
دونوں کو اک ادا میں رضا مند کر گئی
وہ بادۃ شبانہ کی سرمستیاں کہاں
اٹھیے بس اب کہ لذتِ خوابِ سحر گئی
اڑتی پھرتی ہے خاک مِری کوئے یار میں
بارے اب اے ہوا ہوسِ بال و پر گئی
دیکھو تو دلفریبیِ اندازِ نقشِ پا
موجِ خرامِ یار بھی کیا گل کتر گئی
ہر بوالہوس نے حُسن پرستی شعار کی
اب تو آبروئے شیوۃ اہلِ نظر گئی
مارا زمانے نے اسداللہ خاں تمہیں
وہ ولولے کہاں وہ جوانی کدھر گئی