چرخ سے کچھ امید تھی ہی نہیں (اکبر الہ آبادی)

چرخ سے کچھ امید تھی ہی نہیں

آرزو میں نے کوئی کی ہی نہیں

مذہبی بحث میں نے کی ہی نہیں

فالتو عقل مجھ میں تھی ہی نہیں

چاہتا تھا بہت سی باتوں کو

مگر افسوس اب وہ جی ہی نہیں

اس مصیبت میں دل سے کیا کہتا

کوئی ایسی مثال تھی ہی نہیں

آپ کیا جانیں قدر یااللہ

جب مصیبت کوئی پڑی ہی نہیں

شرک چھوڑا تو سب نے چھوڑ دیا

میری کوئی سوسائٹی ہی نہیں

پوچھا اکبر ہے آدمی کیسا

ہنس کے بولے وہ آدمی ہی نہیں