گُل پھینکے ہیں اوروں کی طرف بلکہ ثمر بھی (میرزا محمد رفیع سودا)

گُل پھینکے ہیں اوروں کی طرف بلکہ ثمر بھی

اے خانہ بر اندازِ چمن کچھ تو اِدھر بھی

 

کیا ضد ہے خدا جانے مجھ ساتھ وگرنہ

کافی ہے تسلی کو مِری ایک نظر بھی

 

کس ہستئی موہوم پہ نازاں ہے تو اے یار

کچھ اپنے شب و و روز کی  ہے  تجھ کو خبر بھی

 

تنہا تِرے ماتم میں نہیں شامِ سیہ پوش

رہتا ہے سدا چاک گریبانِ سحر بھی

 

سودا تِری فریاد سے آنکھوں میں کٹی رات

آئی ہے سحر ہونے کو ٹُک تو کہیں مر بھی

Leave a Reply

Your email address will not be published. Required fields are marked *