ضبط سے نا آشنا ہم ، صبر سے بیگانہ ہم
انجمن میں ہیں شریکِ قسمتِ پروانہ ہم
خود ہی سازِ بے خودی کو چھیڑ دیتے ہیں کبھی
خود ہی سنتے ہیں حدیثِ ساغر و پیمانہ ہم
دفعتاً سازِ دو عالم بے صدا ہو جائے گا
کہتے کہتے رُک گئے جس دن تِرا افسانہ ہم
وحدت و کثرت میں ہیں دو جلسہ گاہیں دوست کی
اک تجلی خانہ دنیا ، اک تجلی خانہ ہم
دل جلا پھر خود جلے پھر ساری دنیا جل گئی
سوز لائے ہیں بہ مقدارِ پرِ پروانہ ہم
جب ہمیں دیوانہ بننا ہے تو کیسی مصلحت
مصلحت کو بھی بنا دیں گے تِرا دیوانہ ہم