درخت۔۔۔۔۔ میرے دوست
درخت! میرے دوست
تم مل جاتے ہو مجھے کسی نہ کسی موڑ پر
اور آسان کر دیتے ہو میرا سفر
تمہارے پیروں کی انگلیاں
جمی رہیں پاتال کے بھیدوں پر
قائم رہے میرے دوست
تمہارت تنے کی متانت اور قوت۔۔۔۔
دھوپ اور بارش تمہیں اپنے تحفوں سے نوازتی رہے
تم بہت پروقار اور سادہ ہو
میرے تھیلے کو جاننا چاہتے ہو
ضرور ۔۔۔۔ یہ لو میں اِسے کھولتا ہوں
روٹیاں ، دعائیں اور نظمیں
میرے پاس اِس سے زیادہ کچھ نہیں
ایک شاعر کے پاس اِس سے زیادہ کچھ نہیں ہوتا
دوست! دکھ دینا تم نےسیکھا ہی نہیں
تم نے نہ تو مجھ سے شاعری کا مطلب پوچھا
اور نہ کبھی میرے مطالعے پر شک کیا
ایسا ہی پونا چاہیئے دوستوں کو
اگر میرے ایک اور زندگی ہوتی
تو میں اپنی پہلی زندگی تمہاری جڑوں پر گزار دیتا
مگر میں گھر سے
خاندان بھر کی خوشیوں کے لیے نکلا ہوں
اور وہاں میرا انتظار کیا جا رہا ہے
تم نے میرے دوست
ہاں! تم نے!
بہت کچھ سکھایا ہے مجھے
مثلاً زمین اور اسمانی بجلی
اور ہوا
اور انتظار
اور دوسروں کے لیے زندہ رہنا
بہت قیمتی ہیں یہ باتیں
میں کیا دے سکتا ہوں اِس فیاضی کا جواب
میرے پاس تمہارے لئے
ایک روٹی اور دعا ہے
روٹی: تمہاری چیونٹیوں کے لئے
دعا: تمہارے آخری دن کے لئے
مجھے معلوم ہے تم نے کلہاڑی کے مصافحے
اور آری کی ہنسی سے کبھی خوف نہیں کھایا
مگر تم روک نہیں سکتے اِنہیں
کوئی بھی نہیں روک سکتا
خدا کرے۔۔۔۔
خدا کرے تمہاری شاخوں سے ایک جھونپڑی بنائی جائے
بازوؤں کے گھیرے میں نہ آنے والے تمہارے تنے کی لکڑی
بہت کافی ہے
دو پہیوں اور ایک کشتی کے لئے
دوست: ہم پھر ملیں گے
مسافر اور چھکڑا
مسافر اور کشتی
کہیں نہ کہیں ہم پھر ایک ساتھ ہوں گے
کہیں نہ کہیں
ایک ساتھ۔۔۔۔۔ ہم سامنا کریں گے
ہوا کا اور راستوں کا
مسرت کا اور موت کا