کچھ نہ کچھ سوچتے رہا کیجے (رسا چغتائی)

کچھ نہ کچھ سوچتے رہا کیجے

آسماں دیکھتے رہا کیجے

چار دیواریٔ عناصر میں

کودتے پھاندتے رہا کیجے

اس تحیر کے کارخانے میں

انگلیاں کاٹتے رہا کیجے

کھڑکیاں بے سبب نہیں ہوتیں

تاکتے جھانکتے رہا کیجے

راستے خواب بھی دکھاتے ہیں

نیند میں جاگتے رہا کیجے

فصل ایسی نہیں جوانی کی

دیکھتے بھالتے رہا کیجے

آئینے بے جہت نہیں ہوتے

عکس پہچانتے رہا کیجے

زندگی اس طرح نہیں کٹتی

فقط اندازتے رہا کیجے

نا سپاسان علم کے سر پہ

پگڑیاں باندھتے رہا کیجے

Leave a Reply

Your email address will not be published. Required fields are marked *