ملک مصر میں ایک امیر کے دو بیٹے تھے ۔ ایک نے علم حاصل کیااور دوسرے نے مال و دولت اکٹھا کیا ۔ نتیجہ یہ ہوا کہ علم حاصل کرنے والا بہت بڑا عالم بن گیا اور دوسرا ملک مصر کا وزیر ہو گیا ۔ -مال و دولت کا مالک بھائی عالم بھائی کو نفرت و حقارت سے دیکھتا کیوں کہ اس کے پاس مال و دولت جمع نہیں تھے۔ اور کہتا کہ ہم تو سلطنت کے اہم ستون بن گئے ہیں اور تو بیچارہ مفلس ہی رہا۔ عالم نے کہا مجھ پر اللہ تعالیٰ کی نعمت کا زیادہ شکر واجب ہے کیوں کہ میں نے علم حاصل کیا اور پیغمبروں کی میراث پائی اور تجھے حکومت میں حصہ ملا گویا تو نے فرعون اور ہامان کی میراث حاصل کی ۔
مثنوی : میں تو وہ مسکین چیونٹی ہوں جس کو پیر سے مسل دیا جائے ۔ میں بھڑ نہیں جس کے ڈنگ سے سب ڈرتے ہیں ۔ میں خدا کی نعمت کا شکر کیسے ادا کروں کہ مجھ میں کسی کو ستانے کی طاقت ہی نہیں ہے ۔