تجھے کھو کر بھی تجھے پاؤں جہاں تک دیکھوں
حسنِ یزداں سے تجھے حسنِ بتاں تک دیکھوں
تُو نے یوں دیکھا ہے جیسے کبھی دیکھا ہی نہ تھا
مِیں تو دل میں تِرے قدموں کے نشاں تک دیکھوں
صرف اس شوق میں پوچھی ہیں ہزاروں باتیں
میں تِرا حُسنِ بیاں تِرے ترے حُسنِ بیاں تک دیکھوں
وقت نے ذہن میں دھندلا دیے تیرے خد و خال
یوں تو میں ٹوٹتے تاروں کا دھواں تک دیکھوں
دل گیا تھا تو یہ آنکھیں بھی کوئی لے جاتا
میں فقط ایک ہی تصویر کہاں تک دیکھوں
اک حقیقت سہی فردوس میں حوروں کا وجود
حسنِ انساں سے نپٹ لوں تو وہاں تک دیکھوں