تشنگی آنکھوں میں ، اور دریا خیالوں میں رھے
ھم نَوا گر خوش رھے ، جیسے بھی حالوں میں رھے
اِس قدر دنیا کے دُکھ ، اے خُوبصُورت زندگی
جس طرح تتلی کوئی ، مَکڑی کے جالوں میں رھے
دیکھنا اے راہ نوردِ شوق ، کُوئے یار تک
کچھ نہ کچھ رنگِ حِنا ، پاؤں کے چھالوں میں رھے
ھم سے کیوں مانگے حسابِ جاں ، کوئی جب عمر بھر
کون ھیں ، کیا ھیں ، کہاں ھیں؟ اِن سوالوں میں رھے
بدظنی ایسی کہ ، غیروں کی وفا بھی کھوٹ تھی
سُوئے ظن ایسا کہ ، ھم اپنوں کی چالوں میں رھے
ایک دُنیا کو ، میری دیوانگی خوش آ گئی
یار مکتب کی کتابوں کے ، حوالوں میں رھے
عشق میں دنیا گنوائی ھے ، نہ جاں دی ھے فراز
پھر بھی ھم ، اَھلِ مُحبت کی مثالوں میں رھے۔