مل ہی آتے ہیں اسے ایسا بھی کیا ہو جائے گا
بس یہی ناں درد کچھ دل کا سوا ہو جائے گا
وہ مِرے دل کی پریشانی سے افسردہ ہو کیوں
دل کا کیا ہے کل کو پھر اچھا بھلا ہو جائے گا
گھر سے کچھ خوابوں سے ملنے کیلیے نکلے تھے ہم
کیا خبر تھی ۔۔ زندگی سے سامنا ہو جائے گا
رونے لگتا ہوں محبت میں تو کہتا ہے کوئی
کیا تِرے اشکوں سے یہ جنگل ہرا ہو جائے گا
کیسے آ سکتی ہے ایسی دل نشیں دنیا کو موت
کون کہتا ہے کہ یہ سب کچھ فنا ہو جائے گا