غمِ دوراں نے بھی سیکھے غمِ جاناں کے چلن
وُہی سوچی ہوئی چالیں وُہی بے ساختہ پن
وُہی اِقرار میں اِنکار کے لاکھوں پہلو
وُہی ہونٹوں پہ تبسم وُہی ابرو پہ شکن
کِس کو دیکھا ہے کہ پندارِ نظر کے باوصف
ایک لمحے کے لئے رک گئی دل کی دھڑکن
کون سے فصل میں اس بار ملے ہیں تجھ سے
کہ نہ پروائے گریباں ہے نہ فکرِ دامن
اب تو چبھتی ہے ہوا برف کے میدانوں کی
اِن دنوں جسم کے احساس سے جلتا ہے بدن
ایسی سونی تو کبھی شامِ غریباں بھی نہ تھی
دل بجھے جاتے ہیں اے تیرگئی صبحِ وطن