مِری زندگی ہے ظالم تِرے غم سے آشکارا
تِرا غم ہے در حقیقت مجھے زندگی سے پیارا
وہ اگر برا نہ مانیں تو جہانِ رنگ و بو میں
میں سکونِ دل کی خاطر کوئی ڈھونڈ لوں سہارا
مجھے تجھ سے خاص نسبت، میں رہینِ موجِ دریا
جنہیں زندگی تھی پیارے انہیں مِل گیا کنارہ
میں بتاؤں فرق ناصح جو ہے مجھ میں اور تجھ میں
مِری زندگی تلاطم تِری زندگی کنارا
کوئی اے شکیل ! دیکھے یہ جنوں نہیں تو کیا ہے
کہ اُسی کے ہو گئے ہم جو نہ ہو سکا ہمارا